បាត់ដំបង៖ ស្ថានភាពទឹកជំនន់ស្ទឹងសង្កែនៅល្ងាចថ្ងៃទី១៧ ខែតុលានេះបានស្រកចុះជាង ២ម៉ែត្រដែលធ្វើឲ្យកម្ពស់ទឹកក្នុងស្ទឹងនៅសល់ត្រឹម ១២ម៉ែត្រប៉ុណ្ណោះដែលធ្វើឱ្យស្ថានភាពជំនន់ក្នុងក្រុងបានធូរស្បើយ។

អ្នករាយការណ៍សារព័ត៌មាន EAC news ប្រចាំខេត្តបាត់ដំបងបានឲ្យដឹងថានៅល្ងាចម៉ោងប្រមាណ៦និង០០នាទី ថ្ងៃទី១៧ ខែតុលានេះ ទឹកស្ទឹងសង្កែបានស្រកនៅសល់ត្រឹមកម្ពស់១២ម៉ែត្រ ដែលធ្វើឲ្យទឹកជំនន់នៅតាមផ្សារ តាមភូមិមួយចំនួននៃខេត្តបាត់ដំបងបានស្រកស្ទើរទាំងអស់ហើយ។

ការស្រកនេះគឺដោយសារតែមិនសូវមានភ្លៀងនៅផ្នែកខាងលើនៃស្ទឹងក្នុងស្រុកសំឡូត ដែលធ្វើឲ្យទឹកស្ទឹងសង្កែអាចហូរបានស្រួលចាក់ទៅបឹងទន្លេសាប។

កាលពីព្រឹកមិញកម្ពស់ទឹកក្នុងស្ទឹងសង្កែបានហក់ឡើងដល់ជាង១៤ម៉ែត្រជាកម្រិតប្រកាសអាសន្ន ធ្វើឲ្យលិចលង់ផ្នែកខ្លះនៃក្រុងបាត់ដំបង និងស្រុកមួយចំនួនទៀត ខណៈអាជ្ញាធរអំពាវនាវដល់ពលរដ្ឋឲ្យមានការប្រុងប្រយ័ត្នខ្ពស់ក្រែងមានគ្រោះថ្នាក់ណាមួយកើតឡើងជាយថាហេតុ៕